नवलपुर,असोज २६ । दक्षिण कोरियामा करिब आठ वर्ष बिताएर स्वदेश फर्किएका मिलन पन्थले विदेशमा हासिल गरेको अनुभवलाई उपयोग गर्दै काठमाडौंमा शैक्षिक परामर्श संस्था सञ्चालनमा ल्याएका छन् । विदेश अध्ययन गर्न चाहने विद्यार्थीलाई सही सूचना, पारदर्शी सेवा र जिम्मेवार परामर्श उपलब्ध गराउने उद्देश्यले एस्ट्रा ग्लोबल एजुकेसन एन्ड सर्भिसेज सञ्चालनमा ल्याइएको हो ।

संस्थाको उद्घाटन फर्सुराम पाण्डेयले गर्नुभएको हो । सामान्य पारिवारिक पृष्ठभूमिबाट अघि बढ्नुभएका पन्थले विदेशमा रहँदा विद्यार्थीले भोग्नुपर्ने व्यावहारिक समस्या नजिकबाट अनुभव गरेपछि स्वदेशमै रहेर यस क्षेत्रमा काम गर्ने सोच बनाएको जानकारी दिनुभयो ।

दक्षिण कोरियामा रहँदा विदेश अध्ययनका लागि आवश्यक प्रक्रिया, शुल्क, शैक्षिक अवसर र विद्यार्थीले सामना गर्नुपर्ने चुनौतीबारे नजिकबाट बुझ्ने अवसर पाएको उहाँले बताउनुभयो । आवश्यक जानकारीको अभाव, सेवा शुल्कमा अस्पष्टता र उचित मार्गदर्शन नपाउँदा विद्यार्थी तथा अभिभावक अन्योलमा पर्ने अवस्था देखेपछि जिम्मेवार परामर्श सेवा सञ्चालन गर्ने उद्देश्यले संस्था स्थापना गरेको उहाँको भनाइ छ ।

“विदेश अध्ययन धेरै विद्यार्थी र परिवारको भविष्यसँग जोडिएको विषय हो । यसका लागि परिवारले ठूलो आर्थिक लगानी र मेहनत गरेका हुन्छन् । त्यसैले विद्यार्थीलाई सही सूचना दिएर आफ्नो क्षमता, आर्थिक अवस्था र भविष्यको लक्ष्यअनुसार निर्णय लिन सहयोग गर्नुपर्छ,” पन्थले बताउनुभयो ।

उहाँका अनुसार विदेश अध्ययनसम्बन्धी परामर्श विद्यार्थीलाई विदेश पठाउने प्रक्रियामा मात्र सीमित हुनुहुँदैन । विद्यार्थीको शैक्षिक योग्यता, रुचि, आर्थिक अवस्था र दीर्घकालीन योजनाका आधारमा उपयुक्त देश, विषय तथा शैक्षिक संस्था छनोट गर्न सहयोग गर्नु पनि परामर्शदाताको जिम्मेवारी हो ।

एस्ट्राले दक्षिण कोरिया, जापान, बेलायत, न्युजिल्यान्ड, अस्ट्रेलिया तथा युरोपका विभिन्न देशमा उच्च शिक्षा हासिल गर्न चाहने विद्यार्थीलाई आवश्यक परामर्श र आवेदन प्रक्रियामा सहजीकरण गर्ने लक्ष्य राखेको छ । विद्यार्थीको शैक्षिक पृष्ठभूमि र प्रवेश योग्यताअनुसार कलेज तथा विश्वविद्यालय छनोट, भर्नाका लागि आवेदन, आवश्यक कागजात व्यवस्थापन र प्रवेशाज्ञा प्रक्रियासम्बन्धी जानकारी उपलब्ध गराइने संस्थाले जनाएको छ ।

त्यसैगरी, उपलब्ध छात्रवृत्तिका अवसर, अध्ययनका लागि लाग्ने सम्भावित खर्च, आर्थिक योजना तथा भाषा तयारीका विषयमा समेत विद्यार्थीलाई सहयोग गर्ने लक्ष्य संस्थाले राखेको छ । अङ्ग्रेजी भाषाको अन्तर्राष्ट्रिय परीक्षा आइएलटिएस तथा कोरियाली र जापानी भाषाको तयारीका लागि आवश्यक सहजीकरण गर्ने योजना पनि रहेको छ ।

विदेश जानुअघि आवश्यक तयारी, सम्बन्धित देशका नियम, त्यहाँको जीवनशैली र अध्ययनका क्रममा ध्यान दिनुपर्ने विषयबारे जानकारी दिनु आफ्नो सेवाको महत्त्वपूर्ण पक्ष भएको पन्थले बताउनुभयो ।

विदेश अध्ययन परामर्श क्षेत्रमा विद्यार्थी र अभिभावकको विश्वास कायम राख्न शुल्क तथा सेवाबारे स्पष्ट जानकारी दिनुपर्नेमा उहाँले जोड दिनुभयो । विद्यार्थीले कुनै पनि प्रक्रिया सुरु गर्नुअघि आफूले प्राप्त गर्ने सेवा, लाग्ने खर्च, आवश्यक कागजात र सम्भावित चुनौतीबारे जानकारी पाउनुपर्ने उहाँको भनाइ छ ।

“विद्यार्थी विदेश जानु मात्र सफलता होइन । आफ्नो क्षमता र आवश्यकताअनुसार सही निर्णय लिनु महत्त्वपूर्ण हुन्छ । हामीले भर्ना वा प्रवेशाज्ञाको नतिजा सुनिश्चित गर्नेभन्दा पनि सही सूचना, यथार्थपरक परामर्श र जिम्मेवार सहजीकरणलाई प्राथमिकता दिनुपर्छ,” उहाँले बताउनुभयो ।

विदेशमा प्राप्त अनुभवलाई स्वदेशमै उपयोग गर्दै उद्यमशीलताको विकास गर्ने र विद्यार्थीलाई उपयोगी सेवा प्रदान गर्ने उद्देश्यले संस्था सञ्चालनमा ल्याएको पन्थले जानकारी दिनुभयो । आगामी दिनमा विद्यार्थी तथा अभिभावकलाई गुणस्तरीय सेवा उपलब्ध गराउँदै संस्थाको सेवा विस्तार गर्ने लक्ष्य रहेको उहाँले बताउनुभयो ।

एस्ट्रा ग्लोबल एजुकेसन एन्ड सर्भिसेजले विदेश अध्ययन गर्न चाहने विद्यार्थीलाई उपयुक्त गन्तव्य छनोटदेखि अध्ययनका लागि आवश्यक तयारीसम्म सहयोग गर्ने लक्ष्य राखेको छ । संस्थाले पारदर्शिता, विश्वास र जिम्मेवार परामर्शलाई आफ्नो कार्यशैलीको आधार बनाउने जनाएको छ ।

एकिकृत दुग्ध विकास सहकारी संस्थाको २७औँ वार्षिक साधारणसभा सम्पन्न 

विमा गाहा मगर । नवलपुर, असोज २६ । एकिकृत दुग्ध विकास सहकारी संस्था लिमिटेडको २७औँ वार्षिक साधारण सभा सोमबार नेपाल आमा समूहको सभाहलमा सम्पन्न भएको छ।

गैँडाकोटमा नारायणी नदीमा डुबेर ११ वर्षीया बालिका घाइते

नवलपुर, असोज २६ । पूर्वी नवलपरासीको गैँडाकोट नगरपालिका–२ स्थित बोटेटोलमा नारायणी नदीमा डुबेर ११ वर्षीया बालिका घाइते भएकी छन्। सोमबार दिउँसो करिब

कावासोतीको खरकट्टा जङ्गलमा  बसको  ठक्करबाट पैदलयात्रीको मृत्यु

नवलपुर,असोज २४ । पूर्वपश्चिम राजमार्गको नवलपुरमा यात्रुवाहक बसको ठक्करबाट एक जनाको मृत्यु भएको छ । आज साँझ जिल्लाको कावासोती–८ खरकट्टा जङ्गलमा