कावासोतीमा विश्व पर्यटन दिवसको अवसरमा साइकल दौड प्रतियोगिता हुँदै

बिहीबार असोज २०८३, ८

नवलपुर, असोज ८ । कावासोतीमा विश्व पर्यटन दिवसको अवसर पारेर साइकल दौड प्रतियोगिता आयोजना हुने भएको छ। खेलकुदसँगै स्थानीय पर्यटकीय क्षेत्रको प्रवर्द्धन गर्ने उद्देश्यले कावासोती नगरपालिकाको आयोजनामा प्रतियोगिता हुन लागेको हो।

आयोजकका अनुसार प्रतियोगिता २०८३ असोज ११ गते आइतबार (सेप्टेम्बर २७, २०२६) आयोजना हुनेछ। साइकल दौड बालुवा डाँडा, कावासोतीको शिरदेखि अमलटारी हुँदै नारायणीको तीरसम्म सञ्चालन हुने जनाइएको छ।

प्रतियोगिताको रुट कावासोती नगरपालिका, वि.पि. चोक, हाटबजार चोक, बेलचोक, विष्णुनगर, महाराजा मन्दिर, रडेखानी, लोकाहा, शान्ति टोल, पिठौली चौर, जटायु रेस्टुरेन्ट, सोंढ, मिन चुवाडी, चिलाहा, रतौल होमस्टे, गुन्द्रही मुसेहर टोल हुँदै अमलटारी होमस्टे र बाघखोरमा समापन हुने उल्लेख छ।

कार्यक्रमको उद्घाटन कावासोती नगरपालिका परिसरबाट बिहान ५ः३० बजे हुने र समापन कावासोती–१५ मा गरिने आयोजकले जनाएको छ।

“प्रकृति र पर्यटनका लागि साइकल नै उत्तम माध्यम” भन्ने सन्देशसहित आयोजना गर्न लागिएको प्रतियोगिताले खेलकुदमार्फत कावासोती तथा आसपासका पर्यटकीय गन्तव्यको प्रचार–प्रसारमा सहयोग पुग्ने अपेक्षा गरिएको छ।