नेपाल र बंगलादेशबीच आउँदो चैतमा तीन खेलको टी–२० अन्तर्राष्ट्रिय शृङ्खला हुने

बिहीबार असोज २०८३, १

नवलपुर,असोज १ । नेपाल र बंगलादेशबीच यसै वर्षको चैतमा तीन खेलको टी–२० अन्तर्राष्ट्रिय क्रिकेट शृङ्खला हुने भएको छ ।

नेपाल क्रिकेट संघ क्यान र बंगलादेश क्रिकेट बोर्ड बीसीबीको संयुक्त पहलमा नेपालले बंगलादेशसँग तीन खेलको द्विपक्षीय टी–२० अन्तर्राष्ट्रिय शृङ्खला खेल्ने भएको हो ।

नेपाल क्रिकेट संघ क्यानका अनुसार तीनवटै खेल कीर्तिपुरमा रहेको त्रिवि अन्तर्राष्ट्रिय क्रिकेट मैदानमा आयोजना हुनेछन् । पहिलो खेल मार्च २६ अर्थात् चैत १२ गते, दोस्रो खेल मार्च २८ अर्थात् चैत १४ गते र तेस्रो खेल मार्च ३० अर्थात् चैत १६ गते हुनेछ ।

यो शृङ्खला नेपाली क्रिकेटका लागि ऐतिहासिक हुने क्यानले जनाएको छ । आईसीसीको पूर्ण सदस्य अर्थात् टेस्ट राष्ट्रको टोलीले नेपाल आएर द्विपक्षीय शृङ्खला खेल्न लागेको यो पहिलोपटक हो ।

यसअघि नेपालले टेस्ट राष्ट्रसँग टी–२० अन्तर्राष्ट्रिय खेल खेले पनि ती खेलहरू नेपालबाहिर भएका थिए । नेपाल र बंगलादेशबीच यसअघि दुईवटा टी–२० अन्तर्राष्ट्रिय खेल भएका छन् ।

सन् २०१४ को टी–२० विश्वकपमा पहिलोपटक आमनेसामने भएका यी दुई टोलीबीच सन् २०२४ को टी–२० विश्वकपमा पनि प्रतिस्पर्धा भएको थियो । दुवै खेलमा बंगलादेश विजयी भएको थियो ।

नेपालमा हालै आएको विनाशकारी बाढीका क्रममा ज्यान गुमाएका व्यक्तिहरूको स्मृतिमा नेपाल–बंगलादेश टी–२० शृङ्खला समर्पित गरिने भएको छ । क्यान र बीसीबीले क्रिकेटलाई दुई देशका नागरिकलाई जोड्ने माध्यमका रूपमा लिदै शृङ्खलामार्फत मित्रता, मानवीय संवेदना, ऐक्यबद्धता र सहकार्यको सन्देश दिने बताएका छन् ।

क्यानका सचिव पारस खड्काले बाढीबाट ज्यान गुमाएकाहरूको सम्झनामा शृङ्खला समर्पित गर्ने निर्णयले क्रिकेटभन्दा बाहिर मानवीय सम्बन्ध र दुई देशबीचको मित्रताको सन्देशसमेत प्रवाह गर्ने बताउनुभएको छ ।

शृङ्खला आयोजना गर्ने सहमतिसँगै नेपाल र बंगलादेशबीच क्रिकेट विकासका क्षेत्रमा सहकार्य विस्तार गर्ने विषयमा पनि समझदारी भएको छ ।