बुढीगण्डकी बाढी : घट्टेखोलामा घर बगायो

आइतबार असोज २०८३, २५

नवलपुर,असोज २५ । बुढीगण्डकी नदीमा आइतबार बिहान एक्कासि बाढी आएको छ । बिहान करिब साढे चार बजेतिर बुढीगण्डकीमा बाढी आएपछि स्थानीय घर छाडेर भागेका छन् ।

बाढीले चुमनुब्री–३ घट्टेखोलाका घरहरू पनि बगाएको चुमनुब्री गाउँपालिकाकी उपाध्यक्ष लक्ष्मी गुरुङले बताइन् ।

अहिले स्थानीय ज्यान जोगाउन घर छाडेर हिँडेको र क्षतिको विवरण आइनसकेको उनले बताइन् । चुम्चेतको उङ्गीलुङ खोलामा पहिरो खसेर नदी थुनिँदा बाढी आएको हुन सक्ने अनुमान गरिएको छ ।

‘उङ्गीलुङ खोलामा पहिरो खसेको भन्ने छ, त्यहाँ पनि कोही जान सकेको छैन,’ उनले भनिन्, ‘पहिरो खसेर खोला थुनिने, बाढी आएको भन्ने छ ।’

नदीमा एक्कासि बाढी आएपछि माइकिङ गरेर बुढीगण्डकी नदीको तटीय क्षेत्रका बासिन्दालाई सुरक्षित स्थानमा बस्न भनिएको प्रहरीले जनाएको छ ।