लगातारको वर्षापछि थाइल्याण्डको बैंककका ५० वटै जिल्लालाई विपद् क्षेत्र घोषणा

आइतबार असोज २०८३, ११

नवलपुर,असोज ११ । थाइल्याण्डको राजधानी बैंककमा लगातारको ठूलो वर्षापछि जनजीवन प्रभावित भएको छ ।

सडक तथा बस्तीमा पानी जमेर यातायात सेवा प्रभावित हुनुका साथै केही क्षेत्रका बासिन्दालाई ठाउँमा सारिएको छ । बैंककमा गएको बिहिबारदेखि हिजो दिउँसोसम्म ३०० मिलिमिटरसम्म वर्षा भएको एपी न्युजले जनाएको छ ।

वर्षापछि बैंककका सबै ५० जिल्लालाई बाढी प्रभावित विपद् क्षेत्र घोषणा गरिएको छ । लगातारको वर्षाका कारण सडकहरू जलमग्न भएका छन् । थाइल्याण्डको मौसम विभागका अनुसार बैंककसहित मध्य थाइल्याण्डमा सक्रिय न्यूनचापीय प्रणाली र मनसुनी वायुको प्रभावका कारण आजसम्म अत्यधिक ठूलो वर्षा हुनसक्ने सम्भावना छ ।

त्यहाँको मौसम विभागले नदी तथा नहर आसपास र होचा भूभागमा बाढी तथा डुबानको जोखिम रहेको भन्दै सतर्कता अपनाउन भनेको छ । भोलिदेखि वर्षा केही कम हुने अनुमान छ । तर उत्तरी र मध्य थाइल्याण्डका केही क्षेत्रमा अझै ठुलो वर्षा हुनसक्ने त्यहाँको मौसम विभागको अनुमान छ ।