कालीगण्डकी करिडोरमा मोटरसाइकल दुर्घटना हुँदा एकको मृत्यु, गैँडाकोटमा एक अचेत पुरुष फेला

शनिबार भदौ २०८३, ६

नवलपुर, भदौ ५ । नवलपुरको गैँडाकोटगैँडाकोट नगरपालिका–३ मा शनिबार महेशखोला नजिकै कालीगण्डकी करिडोरमा मोटरसाइकल दुर्घटना हुँदा चालकको मृत्यु भएको छ ।

गैँडाकोट नगरपालिका–३ महेशखोला नजिकै कालीगण्डकी करिडोरमा भएको मोटरसाइकल दुर्घटनामा बुलिङटारका हिराबहादुर सारुको मृत्यु भएको प्रहरीले जनाएको छ।

बुलिङटारबाट ढोडेनीतर्फ आउँदै गरेको ना।२९ प ६७०७ नम्बरको मोटरसाइकल उकालो सडकमा चालकले नियन्त्रण गुमाउँदा दुर्घटना भएको हो। दुर्घटनामा अन्दाजी ४०र४२ वर्षीय सारुको अनुहारमा चोट लागेको थियो।

बुलिङटार घर भई हाल गैँडाकोट–३ ढोडेनीस्थित मामाको घरमा बस्दै आएका उनलाई उपचारका लागि भरतपुर सरकारी अस्पताल, चितवन पठाइएको थियो। उपचारकै क्रममा शनिबार दिउँसो ३ः४५ बजे चिकित्सकले उनलाई मृत घोषणा गरेका थिए।

दुर्घटनामा परेको मोटरसाइकल भने घटनास्थलमै रहेको प्रहरीले जनाएको छ।

यसैबीच, गैँडाकोट नगरपालिका–७ स्थित जयश्री पुल नजिकैको काठको टहरोमा अन्दाजी ६०र६५ वर्षीय एक पुरुष अचेत अवस्थामा फेला परेका छन्। उनको नाम, थर र स्थायी ठेगाना खुल्न सकेको छैन।

नाक र मुखबाट फिँज निस्किएको तथा बोल्न नसक्ने अवस्थामा भेटिएका ती पुरुषलाई तत्काल उपचारका लागि भरतपुर सरकारी अस्पताल पठाइएको प्रहरीले जनाएको छ। उनको अवस्था गम्भीर रहेको बताइएको छ।

दुवै घटनाबारे प्रहरीले थप अनुसन्धान गरिरहेको जनाएको छ।