नवलपरासीमा तीनजना सवार मोटरसाइकल दुर्घटना हुँदा भारतीय नागरिकको मृत्यु, दुई घाइते

आइतबार श्रावण २०८३, १७

नवलपुर,साउन १७ । नवलपरासी (पश्चिम) को पाल्हीनन्दन गाउँपालिका–२ हरपुरमा मोटरसाइकल दुर्घटना हुँदा चालकको मृत्यु भएको छ भने पछाडि सवार दुई जना घाइते भएका छन्।

अनियन्त्रित भई भएको उक्त दुर्घटनामा परी मृत्यु हुनेमा भारतको कुशीनगर जिल्ला, रामकोला गाउँ घर भएका २५ वर्षीय विजय चौहान रहेका छन्।

दुर्घटनालगत्तै गम्भीर घाइते भएका चौहानको सिद्धार्थ सिटी अस्पताल, भैरहवामा उपचारको क्रममा मृत्यु भएको हो।

दुर्घटनामा परेर मोटरसाइकलको पछाडि सवार भारत घर भएका २३ वर्षीय सतिस कुमार चमार र रुपन्देहीको बुटवल उपमहानगरपालिका–३ बस्ने ३६ वर्षीय कमल राना घाइते भएका छन्।

भारतीय नम्बर प्लेटको UP 57 BP 4162 नम्बरको मोटरसाइकल आफैं अनियन्त्रित भई पल्टिएर दुर्घटना भएको प्रहरीले जनाएको छ। घटनाका सम्बन्धमा थप अनुसन्धान भइरहेको छ।