विज्ञान विषयक शैक्षिक भ्रमण: सिकाइ र खोजको अविस्मरणीय यात्रा

बिहीबार भदौ २०८३, ४

नवलपुर,भदौ ४ । मध्यबिन्दु स्काइलाइन एकेडेमीका कक्षा ८, ९ र १० का विद्यार्थीहरूले सौराहा, चितवन राष्ट्रिय निकुञ्ज क्षेत्रमा एकदिने विज्ञान विषयक शैक्षिक भ्रमण सम्पन्न गरेका छन्। कक्षाकोठाभन्दा बाहिर प्रत्यक्ष अनुभवमार्फत ज्ञान हासिल गराउने उद्देश्यले उक्त शैक्षिक भ्रमणको आयोजना गरिएको थियो।

भ्रमणका क्रममा विद्यार्थीहरूले जैविक विविधता संरक्षण केन्द्र/वन्यजन्तु प्रदर्शन तथा सूचना केन्द्रको अवलोकन गरेका थिए। त्यहाँ उनीहरूले नेपालमा संरक्षित विभिन्न चराचुरुङ्गी तथा वन्यजन्तुका प्रजातिहरूका बारेमा जानकारी प्राप्त गरे। संग्रहालयमा प्रदर्शित विभिन्न वन्यजन्तुहरूको अवलोकन गर्दै विद्यार्थीहरूले नेपालको समृद्ध जैविक विविधता तथा वन्यजन्तु संरक्षणको महत्वबारे व्यावहारिक ज्ञान हासिल गर्ने अवसर पाए।

यसै क्रममा विद्यालयले थारू सांस्कृतिक संग्रहालयको पनि भ्रमण गरेको थियो। त्यहाँ विद्यार्थीहरूले थारू समुदायको इतिहास, परम्परा, संस्कृति, जीवनशैली तथा नेपालको सांस्कृतिक विविधताका बारेमा जानकारी लिने अवसर पाए। यस भ्रमणले विद्यार्थीहरूलाई नेपालको बहुसांस्कृतिक पहिचान र विविध समुदायको परम्परालाई नजिकबाट बुझ्न सहयोग पुर्‍यायो।

भ्रमणको अर्को आकर्षण हात्ती प्रजनन केन्द्रको अवलोकन थियो। विद्यार्थीहरूले हात्तीहरूलाई प्रत्यक्ष रूपमा हेर्नुका साथै तिनको संरक्षण, हेरचाह र प्रजननसम्बन्धी जानकारी प्राप्त गरे।

समग्रमा, मध्यबिन्दु स्काइलाइन एकेडेमीका वरिष्ठ विद्यार्थीहरूका लागि यो एकदिने शैक्षिक भ्रमण ज्ञानवर्धक, मनोरञ्जनात्मक तथा अविस्मरणीय रह्यो। प्रकृति, वन्यजन्तु संरक्षण, विज्ञान तथा सांस्कृतिक विविधतासँग सम्बन्धित प्रत्यक्ष अनुभवले विद्यार्थीहरूको सिकाइलाई अझ व्यावहारिक र अर्थपूर्ण बनाएको छ।